ពោធិ៍សាត់)៖ លោក ខូយ រីដា អភិបាលនៃគណៈអភិបាលខេត្តពោធិ៍សាត់ នាថ្ងៃទី២៧ ខែសីហា ឆ្នាំ២០២៥នេះ បាននាំយកស្បៀងអាហារ និងថ្នាំពេទ្យមួយចំនួនធំ ជាអំណោយដែលបានមកពីការចូលរួម ក្នុងស្មារតីស្នេហាជាតិ របស់ប្រជាជនខេត្តពោធិ៍សាត់ និងសប្បុរសជន ព្រមទាំងសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត មកប្រគល់ជូនដល់កងកម្លាំងជួរមុខ ដែលកំពុងឈរជើងការពារបូរណភាពទឹកដី នៅទិសខេត្តព្រះវិហារ ព្រំប្រទល់កម្ពុជា-ថៃ។

លោក ខូយ រីដា បានឱ្យដឹងថា អំណោយដែលបាននាំយកមកប្រគល់ជូនកងកម្លាំងយើងនាឱកាសនេះ គឺជាលើកទី៣ហើយ ដែលជាការចូលរួម របស់ប្រជាជនខេត្តពោធិ៍សាត់ និងសប្បុរសជន ព្រមទាំងសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត រួមទាំងភរិយារបស់ផ្ទាល់ ដែលក្នុងនោះ មានអំបុកលីងជាមួយសាច់ផាត់ ជាស្នាដៃបង្កប់ដោយអត្ថន័យ របស់សមាជិកាសមាគមនារី បានធ្វើផ្ទាល់ដៃ សម្រាប់ចែកជូនដល់កងកម្លាំងជួរមុខ បានទុកពិសា ក្នុងស្មារតីស្នេហាជាតិ ក្រោមទឹកចិត្តអាណិតអាសូរ ខ្មែរស្រលាញ់ខ្មែរ និងការចូលរួមចំណែក ជួយដល់សមរភូមិជួរមុខ។

លោកបានបន្តថា ផលវិបាកនៃសង្គ្រាម បានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្តាច់ជីវិតមនុស្សមិនរើសមុខ ទាំងទាហាន និងជនស៊ីវិលស្លូតត្រង់។ ប្រជាពលរដ្ឋត្រូវបង្ខំចិត្តភៀសខ្លួន ចាកចេញពីផ្ទះសម្បែង ទ្រព្យសម្បត្តិ សត្វចិញ្ចឹម ដែលមិនអាចយកមកជាមួយបាន។

លោកបន្ថែមថា ទុក្ខលំបាកនេះ ធ្វើឱ្យយើងទាំងអស់គ្នាយល់យ៉ាងច្បាស់ណាស់ ពីតម្លៃនៃសន្តិភាព។ ជាមួយគ្នានោះ យើងក៏ចង់បង្ហាញអន្តរជាតិឱ្យបានឃើញថា ប្រជាជនកម្ពុជាត្រូវការសុខសន្តិភាព ហើយក៏មិនចង់បានការឈ្លានពាន ឬជម្លោះណាមួយឡើយ។

លោក ខូយ រីដា ក៏បានថ្លែងអំណរគុណ និងគោរពដឹងគុណ ដល់វីរកងទ័ពជួរមុខកម្ពុជាយើងទាំងអស់ ដែលបានខិតខំការពារបូរណភាពទឹកដី តាមខ្សែរបន្ទាត់ព្រំដែន ប្រកបដោយភាពអង់អាចក្លាហាន និងឈរជើងយ៉ាងរឹងមាំ ប្រឆាំងនឹងសត្រូវឈ្លានពានសៀម។

អំណោយរបស់ប្រជាជនខេត្តពោធិ៍សាត់ និងសប្បុរសជន ព្រមទាំងសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត ដែលត្រូវប្រគល់ជូនកងទ័ព ទិសខេត្តព្រះវិហារ រួមមាន៖ អំបុក២៣បេ ស្មើនឹង១,១៥០កញ្ចប់, សាច់ផាត់៧០០កញ្ចប់, ត្រីងៀតត្រីឆ្តោ២៨៨គីឡូក្រាម, ត្រីងៀតត្រីរ៉ស់១០៥គីឡូក្រាម, ត្រីងៀតត្រីប្រា១២៣គីឡូក្រាម, ប្រហុក៥៥គីឡូក្រាម, ត្រីស្រស់៤កេស, ទុរេន២៥០គីឡូក្រាម, ទឹកបរិសុទ្ធ១ពាន់កេស, ថ្នាំ និងបរិក្ខាពេទ្យ១ពាន់ឃីត ព្រមទាំងស្បៀងអាហារ និងផ្លែឈើមួយចំនួនទៀត៕