ភ្នំពេញ)៖ លោកឧបនាយករដ្ឋមន្ត្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បង្ហាញពីការចូលរួមរបស់សហភាពសហព័ន្ធយុវជនកម្ពុជា ក្នុងការគាំទ្រដល់ការប្រឡងសញ្ញាបត្របាក់ឌុបរបស់សិស្សថ្នាក់ទី១២ រាប់ចាប់តាំងពីការជួយបង្រៀនបំប៉នដល់សិស្សមុនប្រឡង ការចូលរួមមើលថែលើមធ្យោបាយធ្វើដំណើរពេលប្រឡង និងការរៀបចំកន្លែងស្នាក់នៅសម្រាប់សិស្សប្រឡងសញ្ញាបត្រមធ្យមសិក្សាទុតិយភូមិ ដោយមិនគិតថ្លៃផងដែរ។

លោកឧបនាយករដ្ឋមន្ត្រី ហ៊ុន ម៉ានី បានបញ្ជាក់ដូចនេះនាព្រឹកថ្ងៃទី២៨ ខែសីហា ឆ្នាំ២០២៥នេះ នាឱកាសដែលលោក និងលោកបណ្ឌិសភាចារ្យ ហង់ជួន ណារ៉ុន អញ្ជើញបើកវិញ្ញាសារប្រឡង នៅមណ្ឌលប្រឡងក្នុងវិទ្យាល័យ ព្រះស៊ីសុវត្ថិ ក្នុងរាជធានីភ្នំពេញ ដូចបណ្តាឆ្នាំកន្លងទៅផងដែរ។

លោកឧបនាយករដ្ឋមន្ត្រី ហ៊ុន ម៉ានី បានបញ្ជាក់ដែរថា ពាក់ព័ន្ធនឹងការចូលរួមចំណែកជួយដល់សិស្សានុសិស្សប្រឡងបាក់ឌុបនេះ ស.ស.យ.ក បានចូលរួមទាំងពីឆ្នាំ២០១៤មកម្លេះ ដើម្បីបង្ហាញនូវការគាំទ្រ និងភាពជឿជាក់ទៅលើការដឹកនាំរបស់លោកបណ្ឌិសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ក្នុងការរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិជារៀងរាល់ឆ្នាំ។

លោកឧបនាយករដ្ឋមន្ត្រី ហ៊ុន ម៉ានី បានបន្ថែមទៀតថា ការចូលរួមរបស់សហភាពសហព័ន្ធយុវជនកម្ពុជា ទៅលើការរៀបចំប្រឡងសញ្ញាបត្របាក់ឌុបនេះ គឺនៅមុនដំណាក់កាលប្រឡង បានរៀបចំក្នុងជួយបង្រៀនបំប៉នបន្ថែមដល់សិស្សត្រៀមប្រឡង ដើម្បីជួយក្នុងការសម្រួចសមត្ថភាពបន្ថែមដល់សិស្សអាចឈានដល់ការប្រឡងឱ្យបានទទួលជោគជ័យ។

ជាមួយគ្នានោះនៅក្នុងដំណាក់កាលប្រឡងនេះ សមាជិករបស់សហភាពសហព័ន្ធយុវជនកម្ពុជា ក៏បានដើរតួនាទីក្នុងការផ្តល់សេវាមើលថែលើមធ្យោបាយធ្វើដំណើរ មានដូចជា ការយាម កង់ ម៉ូតូ របស់សិស្សចូលប្រឡង ដើម្បីសុវត្ថិភាពលើមធ្យោបាយធ្វើដំណើររបស់ពួកគាត់ និងកុំឱ្យសិស្សកំពុងប្រឡងមានការព្រួយបារម្ភលើ កង់ ម៉ូតូ របស់ពួកគាត់ផងដែរ។

លោកឧបនាយករដ្ឋមន្ត្រី ហ៊ុន ម៉ានី បានបន្ថែមទៀតថា សម្រាប់ប្រធានសហភាពសហព័ន្ធយុវជនកម្ពុជា នៅតាមរាជធានី ខេត្ត ក៏បានរៀបចំន្លែងមួយចំនួនសម្រាប់សិស្សមកពីតំបន់ឆ្ងាយមកកាន់មណ្ឌលប្រឡងបានស្នាក់នៅ និងធានាបានសុវត្ថិភាព ដោយមិនយកថវិកា ថែមទាំងបានរួមចំណែកក្នុងការជួយគិតគូរដល់ការទទួលទានផ្សេងៗផងដែរ៕